Gemeentes op hierdie bladsy:

Hierdie is die 2e oudste NG gemeente in Pta. en is in 1920 gestig. Die besluit is geneem in die "Sunnyside-saal" deur al die " mannelike lidmate".

Die foto's van oud-leraars in die konsistorie lees feitlik soos 'n "Who's who" van die NG kerk. Seker meer so vir die Transvalers!

1e leraar, van 1920-1938 Dr. DJ Keet opgevolg deur Dr. William Nicol. Ds. Weiss, Prof HDA du Toit, Di. Beyers Naude, Kobus Potgieter, Ben Marais, Willie Marais en nog vele ander…

Vir my, 'n integrale deel v.d Pta- Oos kerk, is Chris Lamprecht, orrelis v.d. gemeente vir 26 jr. Hierna is hy na gemeente "Studente-Oord" waar hy, tot met sy aftrede, orrelis was. 

Wat 'n belewenis was dit nie om Sondag na Sondag in Pta.-Oos na sy komposisies, uitgevoer deur die gemeente-koor, te luister nie. Baie v.d. komposisies is deur die "Singkronies" koor, onder leiding van Johan v.d. Sandt, op CD vrygestel. Hoendervleis mooi. Ook, om deel te wees in Universiteitsoord gemeente, saam met duisend studente en Chris Lamprecht voor die orrel, dikwels ook Anton Delen op trompet, wat meer kan jy vra.

Voel altyd vir my asof sulke mense nie genoeg erkenning vir hul onbaatsugtige werk/talent kry nie. Behalwe sy bydrae tot die geestelike genré het hy ook duisende Km's afgelê om van ons volkswysies op te teken.

👏👏🪶🪶

Hierdie is die 4e oudste gemeente vd NG Kerk in die OVS, gestig in 1848. Daar word dadelik begin met die bou van 'n kerk: Hoeksteenlegging 1849 en inwyding 1850. Ds Andrew Murray is die 1e predikant vd gemeente. Hy word in 1849 deur sy vader, Ds. Andrew Murray Snr. van Graaff Reinet, bevestig. Hy vertrek in 1860 en word opgevolg deur Ds. Giles vd Wall, 1862-1870. Die 3e leraar is Ds. Gustaf Radloff, 1870-1881, wat eers rektor van Grey-kollege was. Die ontdekking van diamante bring 'n tydperk van voorspoed vir die Vrystaat. Die kerk is nou te klein en die kerkraad besluit om 'n wedstryd vir die ontwerp vd kerkgebou uit te skryf. Die argitek William Bennett Hays se inskrywing, wat as "Middeleeus Duits', met twee torings van 106vt hoog, beskryf word, wen die kompetisie. Die tenderprys van £33,500 is egter buite die finansieële vermoë vd gemeente en 'n gewysigde ontwerp deur Richard Wocke, word aanvaar, boukoste £17,500. Boustyl word as "modern Romeinschen stijl" beskryf. Hoeksteen word in 1878 deur Pres. Jan Brand gelê en inwyding, sonder skuld, vind in 1880 plaas. 

Die groot griep-epidemie was tydens die dienstyd van Ds JD Kestell. Na die epidemie het "die roepstem van duisende weeskinders' hom so aangegryp, dat sy roerende intrede namens hulle, daartoe gelei het dat £50,000 binne enkele maande ingesamel is. Die Bloemfontein kinderhuis kon toe uitgebrei word om al die weeskinders te versorg en ook om aan hul opvoedings-behoeftes te kon voorsien.

In 1935 het een vd torings vd kerk ingestort. Die ander toring is toe veiligheidshalwe gesloop. 'n Nuwe kerkorrel word installeer en die herstelde kerkgebou word in 1943 ingewy. 

Die 1e kerkraadslede word in 1816 aangestel. Die 1e predikant is Ds Mol, 'n Afrikaner wat in 1817 aangestel word. In 1823 verlaat hy, sonder om afskeid te neem, die gemeente en word predikant op Swellendam. Sy opvolger, Ds Alexander Smith, is 'n Skot wat die gemeente vir 40 jr bedien. Ds. Abraham Steytler wat hom opvolg, beywer hom vir die onderwys en is verantwoordelik vir die stigting vd Riebeeck-kollege vir meisies.

Die geskiedenis van Uniondale lees soos 'n speurverhaal. Die landmeter wat aanvanklik die dorp uitgemeet het, het foute gemaak wat later tot groot onenigheid en hofsake gely het. Hoewel Ds. Rossouw en sy kerkraad daarvan bewus gemaak is dat sekere erwe nie aan die kerk behoort nie het hulle voortgegaan om die erwe ten bate vd kerk te verkoop. Dit het tot 'n hofsaak aanleiding gegee waar uitspraak, met koste, teen die gemeente gegee is. 

Die bou van die kerk het ook etlike probleme opgelewer waarvan finansies die belangrikste was. Toe die boumeester, wat gratis sy dienste aangebied het, siek word en nie meer toesig kon hou nie, gaan die bouery voort, maar nou word die kerktoring met bakstene voltooi. Vier jaar later word melding gemaak vd risiko wat die toring inhou en 'n paar jaar later word die toring afgebreek. Daar was op die stadium nie fondse om 'n nuwe toring te bou nie. In 1905 egter (toe die kerktoring vd George kerkgebou ook herbou moes word), besluit die kerkraad van Uniondale om ook hul kerk se toring te herbou. Argitek FW Hesse word gevra om planne en spesifikasies hiervoor op te trek. Werk vorder fluks en in Des, 1908 word die kerk weer ingewy.

Vanrhynsdorp in die Namakwaland, het op die walle vd Troe-Troerivier ontstaan. Dit was dan ook die aanvanklike naam van beide die dorp en die gemeente, "Troe-Troe". Lg. is in 1877 gestig. In 1883 is die naam verander in erkenning van Petrus Benjamin van Rhijn, wat vir meer as 50 jr. hom be-ywer het vir die ontwikkeling van die Noordweste. Sy kleinseun was vir jare lank 'n bekende politikus.

Die Volmoed-gemeente, in die Oudtshoorn omgewing, is uniek in die opsig dat die kerkgebou reeds 10jr. voor gemeentestigting, ingewy is. 'n Boer vd omgewing "Armoed", WG Olivier, wou graag sien dat daar 'n dorp in die omgewing tot stand gebring moes word. Hy bied toe die kerkraad vd gemeente Oudtshoorn aan om 'n kerkgebou met 700 sitplekke op eie koste op te rig. Die kerkraad kon self die planne goedkeur. Dit was in 1908, maar die kerkraad sien nie hiervoor kans nie. In 1910 besluit hul egter om die aanbod te aanvaar. Die hoeksteen word dan ook in dieselfde jaar gelê. In 1912 word die transport vd grond en die gebou aan die kerkraad oorhandig. Eers in 1921 word die gemeente "Volmoed", gestig.