Gemeentes op hierdie bladsy:

Porterville in die Swartland. Die 1e erwe op die dorp is in 1863 proklameer. In 1869 volg die 1e skool en in 1879 word die gemeente gestig. In 1894 word die 2e kerkgebou voltooi, met sitplek vir 800 mense, nadat die 1e kerk te klein geword het.

Ds. Mostert was predikant hier vanaf 1881 tot 1920. Hy word opgevolg deur Ds. Hugo, onder wie se bediening die kerkgebou wat tans in gebruik is, in 1925 ingewy word.

Argitek was die bekende Wynand Louw van Paarl.

Barrydale NG kerk.

Hierdie dorpie is vernoem na Joseph Barry wat so'n leeue-aandeel in die ontwikkeling vd Overberg en die Klein-Karoo gehad het.

Die gemeente is in 1880 gestig en die 1e agt jaar deur 'n onderwyser, DZ de Villiers bedien. In 1887 word prop. Pieter Pienaar as 1e leraar bevestig.

Die huidige kerkgebou is in 1908 ingewy en boukoste het £5131 beloop. Die gebou is opgerig deur die meesterbouers "Moon & Ledbury" en daar is nie vd dienste van 'n argitek gebruik gemaak nie. Hierdeur is £300 bespaar.

Die orrel, gebou deur 'n Engelse firma Norman & Beard, is 1 van slegs 3 in die land en reeds in 1997 teen R500,000 verseker.

In 1997 is omvangryke herstelwerk aan die binne- en buite-kant vd kerkgebou gedoen. Dit het R110,000 gekos.

Die gemeente is in 1854 gestig met Ds. Servaas Hofmeyer as die 1e leraar. Tydens sy bediening, wat vanaf 1860 tot 1888 (toe hy oorlede is) geduur het, het hy diep spore getrap. Hy was passievol oor die onderwys, beide op sekondêre en tersiêre vlak. In 1866 het hy die 20 jarige John Euvrard, 'n gebore onderwyser, na Montagu laat kom. Dié was vir 40 jaar onderwyser aan die plaaslike skool, vir baie jare as hoof.

In 1906, word Dr DF Malan ('n latere 1e minister van SA)  hier bevestig. Hy neem in 1912 'n beroep na Graaff Reinet aan. Ook hy wy hom toe aan die opheffing vd vele armes in die gemeente. Wat sendingwerk betref het hy ook baie gedoen en nuwe inisiatiewe daar gestel. In sy tyd beplan die kerkraad die bou van 'n nuwe pastorie. Teen die wil van Dr Malan, word 'n groot pastorie ge-bou.

Dr Malan word deur ds. DS. van Huyssteen opgevolg. Tydens sy studiejare het hy 'n tyd lank by die Aliwal-Noord konsentrasiekamp gewerk. Hier moes hy 2X/dag begrafnisse hou, iets wat 'n blywende indruk op hom gemaak het. In Montagu het hy ook onvermoeid aandag gegee aan die arm kinders. Vir die doel het hy tydens sy bediening, die kerkraad oorreed om verantwoordelikheid te aanvaar vir die aankoop en beheer van 4 koshuise. In 1955 het die Univ. van Stellenbosch 'n eredoktorsgraad aan hom toegeken. Dit was in erkenning aan sy volgehoue opheffingswerk onder arm mense wat oor dekades gestrek het.

In 1858 word die hoeksteen van 'n nuwe kerk gelê maar die kerk sou eers in 1862 ingewy word. Die kontrak is toegeken aan "Barry en Neefs" van Swellendam. Die kontrakprys was £4300. Na die ingebruikname is die ou kerk, onder leiding van Bernardus Keet, vir Kleurlingdienste gebruik.

Tydens die Anglo-Boereoorlog is die kerkgebou deur die Kakies annekseer. In 'n brief aan die kerkraad skryf D Huntley, aanvoerder vd Britse magte, dat die kerk vir militêre doeleindes aangewend gaan word en verbied alle "Godsdienstige byeenkomste" tot verder kennisgewing. Twee weke later is vergunning tot die hou van kerkdienste wel toegestaan en die sleutels vd kerk word vir Sondae beskikbaar gestel. Skade aan veral die toring en die vensters vd kerk word in 1904 herstel. Die Engelse dra £50 vd £215  hiertoe by.

("Montagu Mail" Junie 2005.)

'n Nuwe orrel word in 1899 in gebruik geneem. Dieselfde firma wat die orrel gebou het, herbou dit weer 50 jaar later. Die ou orrel word aan die sendingkerk, vir £10 verkoop en is vandag in hul museum te sien.

In 1987 word omvangryke herstellings aan die kerk gedoen.

Hierdie gemeente is in 1862 gestig. Ds. A Louw, vd Fauresmith gemeente, was die konsulent. Met sy sterk persoonlikheid het hy daartoe bygedra dat die nuwe gemeente deeglik gevestig is. Die 1e leraar vd gemeente was Ds. Colin Fraser wat sy hele ampstermyn, 1863-1907, hier deurgebring het. In die tyd het hy 18 beroepe ontvang maar almal bedank. Hy het sy stempel onuitwisbaar op die Vrystaat NG kerk afgedruk waar hy 5 keer as moderator en 4 maal as assessor, verkies is.

Interessant om die siening vd NG kerk van daardie jare oor die Rooms Katolieke kerk te lees. In sy uittree-rede as moderator waarsku hy teen die "Hooge Kerk van Engeland" en die oprig van Roomse skole oral in die land. Hy sê dat die geskiedenis van Protestantisme dit nie kan goedkeur nie want baie Suid-Afrikaners "zijn afstammelingen van de vrome Hugenoten die hunne godsdiensvrijheid met hun goed en bloed gekocht hebben".

Hy het ook sterk standpunte ingeneem t.o.v. drank, dobbelary en Sabatsontheiliging. Soveel so dat wetgewing gewysig is rakende treindienste op Sondae.

Die gemeente van Philippolis het in die Vrystaat uitgestaan vir sy sending ywer, ook te danke aan ds. Fraser.

Ds Fraser het met aansienlike skuld, waarskynlik studieskuld, in die gemeente begin. Die delging daarvan kon hy nie bybring nie en die kerkraad het by meer as een geleentheid hom te hulp gekom asook sy selaris aangepas. Die het in 1875 £500/jr beloop.

(Interessant, wat tot sy probleem bygrdra het was die wisselkoers!! Nooit geweet dat die waarde vd sg. "bluebacks", 2 sjielings en 6 pennies of halfkroon, wanneer dit vir koloniale geld gewissel is, met die helfte gedaal het.)

Dit wil voorkom asof Ds. Fraser of nie goed met geld kon werk nie of bo sy vermoë geleef het (my eie afleiding) want die kerkraad moes hom gereeld finasieël ondersteun. In 1881 is sy selaris met £300 na £800/jr. verhoog.

Sy dogter, Tibbie, is in 1887 met Adv. MT Steyn (latere president vd OVS), getroud.

Die Anglo-Boere oorlog was 'n beproewing!! Wanneer mens oor die omstandighede in die tyd lees kan jy verstaan waarom daar so'n sterk "anti-engelse" gesindheid ontstaan het. 

Die Britse soldate het die kerk as fort gebruik; die omheining is platgetrap, orrel is onherstelbaar beskadig en dele vd preekstoel as brandhout gebruik. Woonhuise van burgers en ook die pastorie, is afgebrand. Meubels en al.

Ds. Fraser en sy jonger dogter is in 'n koletrok na Bloemfontein vervoer; die laaste paar myl moes sy dogter na die vrouekamp buite Bloemfontein stap. 'n Paar maande later is Ds Fraser en sy gesin na die kamp op Norvalspont verplaas en toe na Oos-Londen waar hy mediese behandeling kon ontvang.

Na die oorlog was die eens welvarende gemeente, totaal verarm. Ook Emily Hobhouse het 'n rol gespeel in die heropbou vd dorp en sy gemeenskap.

Hoe vreemd is die weklikheid nie soms nie? Twee persone wat later in hul lewens polities grootliks sou verskil, is etlike myle van mekaar gebore, hier in die Riebeeck-vallei. Genl Smuts in 1870, (oorlede 1950) en Dr Malan in 1874, (oorlede 1959). Beide het die laerskool Riebeeck-Wes bygewoon en Gen Smuts het op 'n stadium vir Dr Malan sondagskool klasse gegee.

Die plaas Allesverloren, met sy bekende wyne, was die eiendom vd Malans en dit is waar Dr. Malan dan ook gebore is. 'n Deel van dieselfde plaas het aan die Smuts-familie behoort en d.i. hier waar Genl. Smuts gebore is. Die Malan's en die Smutse was dus bure.

Dr. Malan was besig met 'n politieke-vergadering vd Nasionale party toe hy die nuus van Genl. Smuts se dood ontvang het. In teenstelling met baie ander "nattes" wat hul oor die tyding verheug het, het Dr. Malan die vergadering onmiddelik be-eindig en 'n oomblik van stilte afgekondig. Hy het steeds hoë agting vir Gen. Smuts as mens, staatsman en leermeester gehad.